Med verknad frå 1. september 2017 er psykisk helsevernlova endra slik at pasienten sin rett til å nekte innlegging og behandling er styrkt, likeeins retten til å avbryte behandling – sjølv om den har ført til betring. Dette har skjedd ved at manglande samtykkekompetanse er innført som eit tilleggsvilkår for bruk av tvang. Vilkåret gjeld vel å merke ikkje når pasienten er til fare for eige liv eller andres liv eller helse. Dette vil føre til at nokre pasientar misser eit gode – klinisk betring av plagene. Men samstundes vinn dei noko som òg har verdi – respekt for autonomien deira og fridom frå tvang.